يوميات طالب هندسة..الجزء التاني

آخر حاجة وصلتلها إن كان في محاضرة شغالة......المحاضرة بتبدأ 8.30 ......,و الساعة دلوقتي 9 ...قولت أروح أشوف إيه النظام...و بما إن دي أول محاضرة....فا أكيد الدكتور مش هيشرح حاجة....و هيقعد يتعرف علينا و يعرف أسامينا وكدة....

هحكيلوا بس نبذة عن نظام المحاضرة..المفروض إحنا دفعتنا 4000 واحد بالمدبلرين....متقسمين على 6 مجموعات.
..كل مجموعة بيديها دكتور معين في وقت معين...ما عدا الرسم الهندسي و الإسقاط....بيضموا مجموعتين و يخلوا المحاضرة إسبوع و إسبوع

نرجع لكلامنا : المفروض إن الدكتور اللي أنا داخله دا "د/سعد الصافي"...أحسن دكتور ميكانيكا في إعدادي (على كلام الدفعات الكبيرة) هو دا اللي بيدي المجموعة الخامسة (بتاعتي)  و دخلت....إلهي كنت أتشل قبل ما أدخل...المفروض إن دا دكتور المجموعة ال5 .... و ببعض الحسبات المجموعة الخمسة دي فيها تقريباً 600 طالب....لقيت جوة 1800 طالب...متسألنيش إزاي....معرفش بقى هما كانوا نفسهم يحضروا عشان يحسوا إن هما مهندسين  ....و لا دخلوا في الزحمة من غير قصدهم....المهم إن الإقبال على المحاضرة دي كان تاريخي يا فندم...

قعدت....أو بمعنى أصح "وقفت" في المحاضرة و طلعت ورقة و قلم زي العيال الدحيحة ,و فضلت أكتب ورا الراجل...ستاتيكا ...أول حاجة أخدتها في هندسة...هو تقريباً كان بيراجع على اللي أخدته في ثانوية عامة....إلى أن قال الكلمة اللي وداني إتفشخت لما سمعتها....."الزنبرك"!؟

في الأول فكرتها كلمة عيب....بس إكتشفت إن زنبرك =سوستة (سبرينج يعني) ......ياخي إلهي و إنت بتقفل السوستة تقطعه و نخلص......الجدير بالذكر إن الدكتور دا بقاله 35 سنة في الكلية تقريباً....سيبته و طلعت طبعاً.....و دي كانت أول محاضرة أطلع منها...و أنا طالع لقيت نص المدرج طالع ورايا....هما تقريباً كانوا مفكرين إنه إجباري تحضر....الحمد لله إني لحقتهم قبل ما يفطسوا.

الساعة دلوقتي 9:45 ...و عندي محاضرة فيزيا الساعة 10:10 .....أعمل إيه أعمل إيه؟! ....قولت آخد لفة في الكلية.....و كانت كسوق عكاظ ....كل واحد بيدور على جارية يظبطها .....في الأول قولت مالها العيال المحرومة دي؟!.....إكتشفت إن من بين كل 100 طالب في 20 بنت ....و بين العشرين بنت في 2 حلوين...وال2 الحلوين واحدة منهم مصاحبة....و ساعات الإتنين مصاحبين.....للأسف ملحقتليش و لا بنت.

قولت أروح بقى المحاضرة....محاضرة فيزيا للدكتورة "مايسا عثمان" .....المحاضرة مش زحمة بس قعدت أنا و تلاتة صحابي على الأرض قدامها....و كان الموضوع لوز اللوز...إلى أنا حدث الحوار الآتي بين الدكتورة و واحد صاحبي :

"لو الجسم بيأثر عليه الجازبية هيعمل عزم إزدواج" 

"دكتورة هو مش عزم الإزدواج المفروض إن يكون في قوتين بيأثروا على الجسم؟"

"صح يا حبيبي"

"طيب الجازبية دي اللي هيا القوة بتاعت الWeight"

"صح برضه"

"طيب يا دكتورة فين القوة التانية؟!"

"القوة التانية هي الوزن"

"دا غير الWeight?!"

"طبعاً"

"شكراً يا دكتورة"

بعد الحوار ده....صديقي ده أخد الكتاب بتاعه و مشى...بس معرفتش أمشي وراه للأسف عشان كنت قاعد قدام و الباب ورا......و من ساعتها الدكتورة دي بيحضرلها 19 واحد في المحاضرة من أصل 600

بعد المحاضرة دي إتأكدت إن كلية الهندسة دي مش زي مانا كنت متصور....دي طلعت أوسخ من مشروع النهضة

بعدها كان عندي رسم هندسي......قولت لأ بقى دا الرسم دا لعبتي....دخلنا دكتور أشبه بميكي ماوس "أنا الدكتور ثامح ذينهم....هدرثلكو رثم هندثي الثنة دي" ولكم أن تتخيلوا كمية الضحك....كنت ببتسم برضه  عشان عيب أضحك....لحد ما قل جملة فشختني ضحك هستيري....عشان أقربلوكوا الموضوع...ضحكت زي ما ضحكت على حلقة باسم بتاعت الكلوتات....الجملة هي: "يا الرثم دا أسلوب إتصال بين المهندثين...يعني إنت مثلاً بترثم الآيذو مترك بتاع الفيلا و ممكن تحط بثين في اللاند ثكيب" أحييه يابو ثوثو!؟

دا كدة أول يوم في الإسبوع عدى بوثاخة.....آسف...بوساخة أقصد

روحت البيت مش شايف قدامي....أبويا قالي "زاكر يابني اللي أخدته" طبعاً كنت هسب...بس لبست بنطلوني و أخدت موبايلي و محفظتي و نزلت على القهوة...

اليوم التاني وفقاً للجدول عندي 3 سكاشن....أنا أصلاً معرفش يعني إيه سكاشن!...طلعت السكاشن دي معظمها بتروح تحل تدريبات على اللي إتاخد في المحاضرات....طيب هو إحنا أخدنا محاضرات يا ولاد الوسخة؟! فتحت الفيسبوك و دخلت على جروب الدفعة لقيت نص الناس بيقولوا في و نص الناس بيقولوا مفيش....قولت أروح و خلاص

 المفروض إن عندي 3 سكاشن: ميكانيكا (بتاعت الزنبرك) و رياضة و حاسبات...مكونتش أعرف إيه حاسبات دي...إكتشفت إن هي كومبيوتر !...و ماله يا حبيبي مش أول مرة أتفاجئ في الكلية مانا إتعودت خلاص

  المهم مكتوب في الجدول "ميكا 302"...المفروض إن أنا أفهم إنها ميكانيكا الدور التالت  تاني أوضة.....ماشي ما علينا مش أول مرة برضه....روحت متأخر و في الآخر طلع مفيش....قولت في عقل بالي أحا...و نزلت ألف تاني لفة ليا في الكلية

المرة دي ركزت في وشوش الناس أكتر.....شوفت ناس كتير فشخ أعرفهم...غير كدة...الكلية كانت عاملة زي إسكندرية في الصيف....كلها فلاحين وكدة...مكنتش معترض لحد ما لقيتهم مشغلين مهرجنات بصوت عالي في نص الكلية.....روحت الكافيتيريا و جبت هوت شوكوليت.....و دي الحاجة الحلوة الوحيدة في الكلية...أحسن كاكاو شربته في حياتي....أحسن من يتاع ستاربكس الغالي ده..عارفيه؟!

روحت أدور بقى على السكشن اللي بعده "ر 403" لا يا راجل؟! معرفتكش أنا كدة...أيوة "ر" يعني "رياضة".....و طلعت و برضه مفيش...قولت أكيد بقى مفيش سكاشن أول إسبوع زي ما بيقولوا و روحت البيت من غير ما أحضر الحاسبات

و لما روحت عرفت إن كان في سكشن  حاسبات...و أنا فوتته...ياخي يلعن أبو أم عم جد اللي إخترع الهندسة.....

لسة في تكملة...إستنوني في الجزء التالت